OKUGOBAGANYIZIBWA KU TTAKA: Ba RDC bayingidde mu nsonga za Nantumbwe
Ababaka ba president mu district y'e Wakiso batabukidde abaserikale ba poliisi mu bitundu by'e Kasangati olw'okuyambako abanyazi b'ettaka mu kitundu kino. Kino kiddiridde emboozi NTV gye yalaze olunaku lw'eggulo Namukadde Margaret Nantumbwe mweyabadde alajaanira olw'abantu abaagala okubba ettaka lye okujja nebamenya enju mw'abadde n'abantu be.Nantumbwe yannyonnyodde nti nga tebanakola kino poliisi ye Kasangati yakwata mutabani we omukulu nga n'okutuusa kati tebamanyi musango gw'avunaanibwa.RDC w'e Wakiso Justine Mbabazi n'ow'e Nansana Ali Nsubuga beeyamye okugonjoola ensonga zino.